Diario de aula (tema 11): Actividade de rúbrica (Eider Carballeira Domínguez e María Rodríguez Valcárcel)

En base á actividade realizada para o bloque de temas 1, 2 e 3 sobre mediación, tivemos que desenvolver unha actividade consistente na elaboración dunha rúbrica que avaliase a nosa proposta. Nun primeiro momento, ao realizarmos esta actividade, a miña compañeira Eider e eu xa propuxemos unha rúbrica, que fixemos cos poucos coñecementos que tiñamos sobre este tipo de ferramentas naquel momento.

Tras as novas nocións recibidas sobre as rúbricas, as súas características e utilidade, a docente propúxonos revisala. Ao facelo, decatámonos de que a nosa versión inicial requiría varias melloras.

En primeiro lugar, decidimos eliminar un apartado destinado a avaliar a comprensión, dado que nos demos conta de que se trata dunha dimensión difícil de avaliar de xeito obxectivo.

Por outra banda, modificamos a redacción dos criterios, posto que entendemos que as rúbricas, por ser obxecto de uso tanto para docentes como para alumnos, deben ser o máis sinxelas e acesibles que sexa posible. É por isto que decidimos simplificar a expresión e eliminar ou modificar palabras complexas e suprimindo todos aqueles indicadores que fosen ambigüos ou que puidesen xerar dúbidas, tales como "ben", "correctamente", "mal", "incorrectamente", etc.

Ademais, inicialmente asignaramos unhas porcentaxes numéricas para a avaliación de cada apartado, non sendo estas equitativas. Entendemos que isto non é adecuado, polo que decidimos eliminar estas porcentaxes, outorgándolle o mesmo peso a todos os criterios.

Por último, fusionamos dúas categorías que nun primeiro momento consideramos por separado: o debate e a toma de decisións, para simplificar e facer máis coherente a rúbrica.

Avaliación da actividade:

Criterios	Sobresaínte	Notable	Aprobado	Insuficiente
Mediación	Reformulo a información con claridade e corrección en base ao contexto	Reformulo a información de forma xeralmente clara en base ao contexto	Reformulo pouco a información e de forma pouco clara	Non reformulo de forma clara e/ou limitome a repetir a información sen adaptala
Expresión oral	O meu discurso é  fluído, coherente e comprensible, con pronunciación e entoación	O meu discurso é maioritariamente fluído, con pequenas pausas ou erros que non dificultan a comprensión	A miña fluidez é  limitada con pausas frecuentes e erros que dificultan a comprensión	O meu discurso ten moitas pausas e erros que dificultan gravemente a comprensión
Uso da lingua	Emprego estruturas e léxico axeitados ao contexto con corrección e variedade	Emprego estruturas e léxico adecuados ao contexto, con erros ocasionais	Uso de xeito limitado  estruturas e léxico, con erros frecuentes	Uso de xeito moi limitado e incorrecto a lingua, impedindo a comunicación
Debate e toma de decisións	Participo activamente, respondo ao compañeiro, fago preguntas e favorezo o diálogo. Contribúo claramente á toma dunha decisión consensuada	Participo frecuentemente e respondo ás intervencións do compañeiro. Participo na decisión final e mostro actitude colaborativa	Participación pouco frecuente; respondo de forma breve ou pouco elaborada. Acepto a decisión pero con escasa implicación na toma desta	Case non participo ou interactúo co compañeiro. Non colaboro nin contribúo á toma de decisións