Diario de aula (temas 1, 2 e 3): Actividade de comprensión oral: Discovering Venice’s Carnival (Eider Carballeira Domínguez e María Rodríguez Valcárcel)

 Actividade de comprensión oral: Discovering Venice’s Carnival

Eider Carballeira Domínguez

María Rodríguez Valcárcel

Didáctica da Ensinanza de Linguas Estranxeiras (2025-2026)

Nome da actividade: Discovering Venice’s Carnival

Nivel: 1º Bacharelato

Temporalización (en que momento se usa, canto dura): Este vídeo é empregado dentro dun conxunto de actividades que se levarán a cabo na última sesión antes das vacacións de Entroido. Esta actividade atópase inserida dentro dun conxunto no que se traballará o Carnaval de tres partes distintas do mundo: Galicia, Venecia e Brasil. Estas actividades levaranse a cabo nunha primeira sesión de 55 minutos, e a presentación do debate final levarase a cabo nunha última sesión.

• Pre-comprensión: 10 minutos

• Visionado e escoita: 13 minutos (2 visionados do vídeo, que dura 4:58’).

• Tempo para a finalizacion da actividade durante o visionado e a súa corrección: 12 minutos

• Post-comprensión: 15 minutos

• Sesión a maiores: 50 minutos

Obxectivos da actividade:

1. Comprender información clave sobre un evento cultural

2. Identificar ideas principais específicos nun vídeo

3. Desenvolver a capacidade de sintetizar información

4. Practicar vocabulario relacionado co carnaval de distintas partes do mundo

5. Promover e fomentar o debate e a expresión oral

Como se desenvolve a actividade:

1. Pre-comprensión:

Levarase a cabo un pequeno brainstorming no que a docente lle lanzará unhas preguntas ao alumnado, nada máis comezar a sesión:

• If we talk about Carnival around the world, what places comes to mind for you? (Se falamos de Carnavais famosos de distintos puntos do mundo, que lugares vos veñen á cabeza?)

Espérase que nese brainstorming o alumnado mencione os tres lugares que se van tratar na sesión: Brasil, Galicia e Venecia. De non ser así, será a propia docente quen, mediante unha presentación de PowerPoint, lles amose estes tres lugares cuxos Carnavais son recoñecidos. Nesta presentación, incluirá vocabulario que poida serlles de utilidade e que se relacione con cada un destes Carnavais. Deste xeito, levarase a cabo unha activación dos coñecementos do alumnado e unha preparación para o vídeo que se lles vai poñer a continuación. Ademais, a docente repartirá folios coas fichas de vocabulario para o estudantado.

A maiores destas listas de vocabulario, achégase tamén un glosario de vocabulario presente no vídeo, que se comentará co alumnado antes de poñer o vídeo para así asegurar a súa comprensión, para así favorecer que non haxa lagoas semánticas durante a escoita do vídeo.

A continuación, a sesión pasará a focalizarse no Carnaval de Venecia, e levarase a cabo o visionado dun vídeo titulado How to survive Venice Carnival as a local. 

2. Actividade durante o visionado:

Entregaraselles unha ficha antes de comezar o visionado do vídeo, dandolles un minuto para que lean as preguntas, e a continuación reproducirase o vídeo. 

3. Post-comprensión:

En grupos de 3 alumnos formados pola docente, o alumnado recibe unha ficha cunha situación comunicativa. Dous alumnos serán turistas que visitan a cidade de Venecia durante o Carnaval; o outro alumno será unha persoa local de Venecia. Os turistas deberán expoñerlle ao veneciano que queren vivir o Carnaval como unha persoa local, facendo preguntas sobre que facer e que non nas datas nas que van estar na cidade. Por outra banda, o local deberá responder a esas preguntas e dar consellos sobre que deben e que non deben facer. Estas preguntas e consellos deberán estar fundamentalmente baseados no vídeo que acaban de visionar, no que, de feito, se fala de cuestións que deben ou non deben facerse nestas datas. En grupos, deberán preparar e practicar un diálogo, que presentarán diante dos compañeiros e a docente ao final da sesión.

• Exemplos de preguntas para os locais:

• Do you participate in the Carnival?

• Do you like the Carnival?

• Does the Carnival have any negative implication in your normal life?

• Where could I buy a mask?

• Exemplos de preguntas ou consellos para os turistas:

• What did you know about the Carnival before arriving here?

• Have you had time to go on the boat through the canal?

• I would avoid the city centre during the main celebrations of the Carnival

• You should try the traditional delicacies while you’re in Venice!

Neste apartado, valorarase a participación activa de cada un dos integrantes do grupo, o emprego do vocabulario achegado pola profesora e presente no vídeo e a fluidez na expresión oral. Para que a profesora poida levar a cabo a avaliación desta actividade, noutra sesión, cada grupo sairá diante do resto da clase, e levará a cabo o diálogo que preparou xunto cos seus compañeiros.

Como se agrupan os alumnos: Para a actividade de pre-comprensión non se formarán grupos, pois o alumnado intervirá de xeito espontáneo. Para a actividade durante o visionado do vídeo tampouco se formarán grupos, pois será unha actividade individual. Para a actividade de post-visionado, pola contra, si que se levará un agrupamento dos alumnos, en grupos 3, formados pola profesora. 

Materiais da actividade:

• Aula de 1º Bacharelato

• Ordenador

• Proxector

• Canva (para a realización de materiais por parte da docente)

• YouTube (para a reprodución do vídeo)

• Folios con ficha de actividades durante o visionado

• Folios con ficha de vocabulario útil da actividade

Avaliación da actividade:

Rúbrica para a avaliación do exercicio durante o visionado

Criterios	Sobresaínte	Notable	Aprobado	Insuficiente
Identificación das ideas principais	Identifica con claridade as ideas principais e os detalles específicos traballados no vídeo	Identifica a maioría das ideas principais, aínda que perde algún detalle concreo	Identifica algunha idea principal con confusións frecuentes	Non identifica as ideas principais do vídeo
Emprego do vocabulario específico	Usa o vocabulario clave do vídeo para responder ás preguntas, aínda que cometa algún erro puntual	Emprega parte do vocabulario clave, con algún erro puntual	Uso moi limitado do vocabulario específico	Non emprega o vocabulario do vídeo
Corrección lingüística (gramática e ortografía)	Non presenta erros, presenta erros moi puntuais ou son irrelevantes; en calquera caso, non dificultan a comprensión	Presenta erros frecuentes, pero estes non dificultan a comprensión	Erros frecuentes que dificultan parcialmente a comprensión	Erros moi frecuentes que dificultan a comprensión

Rúbrica para a avaliación do exercicio posterior ao visionado

Criterios	Sobresainte	Notable	Aprobado	Insuficiente
Adecuación á situación comunicativa	Interacción moi natural, con roles perfectamente definidos e mantidos durante todo o diálogo	Interacción adecuada, con roles mantidos con algunha que outra incoherencia	Os roles están pouco claros ou mantéñense só parcialmente	Non se respectan os roles nin a situación comunicativa proposta
Emprego do vocabulario específico	Uso amplo e correcto do vocabulario traballado na aula e no vídeo sobre a temática	Uso frecuente do vocabulario, malia que con algunhas imprecisións	Uso moi limitado do vocabulario específico	Non se emprega o vocabulario traballado
Fluidez e pronuncia	Expresión fluída, bo ritmo e pronuncia clara	Boa fluidez xeral, con algunhas pausas ou erros de pronuncia	Fluidez limitada, con pausas e erros frecuentes	Moitas dificultades de fluidez e pronuncia
Participación e cooperación	Participación moi activa e equilibrada de todos os membros. Gran implicación persoal	Participación maioritaria dos membros, con implicación persoal	Participación desigual entre os membros do grupo e con certo desinterese	Un ou máis membros non participan

Motivación (por que escolleron esta actividade): Esta actividade é escollida por estar directamente relacionada cunha cuestión moi próxima e significativa para o alumnado: o Entroido. Ademais, para aumentar esta proximidade e significación, será levada a cabo xusto antes das vacacións de Entroido. 

Trátase dunha festividade coñecida e moi próxima para o alumnado (especialmente para o galego, como é o caso), polo que partir dunha situación coñecida e próxima para eles para coñecer outras manifestacións culturais semellantes (Brasil e Venecia) resultaralles especialmente motivador.

Ademais, o uso dun vídeo real en lingua inglesa aumenta a significación e a contextualización da actividade, favorecendo así a súa implicación e interese. Este enfoque contextualizado, real e intercultural fomenta a curiosidade por outras culturas, ao tempo que promove a participación activa e desenvolve destrezas de mediación, comprensión e expresión en lingua inglesa.